Өңірлердің Астана қаласындағы күндері жалғасуда. Елорда тұрғындары мен қонақтары 1-2 қазан аралығында Маңғыстау облысының жетістіктерімен таныса алады.

Орталық коммуникациялар қызметінде өткен баспасөз-конференциясы барысында облыстың әлеуметтік-экономикалық дамуы туралы облыс әкімінің орынбасары Бану Нұрғазиева баяндады. Тәуелсіздіктің 25 жылы ішінде өңірде 32,9 мың орынды жалпы білім беретін мектептер, 26 мың орынды мектепке дейінгі ұйымдар, 1290 төсекті аурухана мен кезеңіне 1857 адамды қабылдайтын амбулаторлық-поликлиникалық ұйымдар іске қосылған. Биыл білім саласының бюджеті 48 млрд. теңгені, денсаулық сақтау саласы 21 млрд. теңгені құрады.

— Мәселен, бүгінгі таңда облыстағы мектепке дейінгі біліммен және тәрбиемен балалардың 80%-ы қамтылып отыр, 2010 жылы бұл көрсеткіш 50%-ды құраған болатын. Ал соңғы бес жылда балабақшалар саны 117 бірліктен 245 бірлікке дейін өсті, соның ішінде 76-сы жекеменшік. Апатты жағдайдағы мектептер мен үш ауысымды оқытуды жою мәселелері толығымен шешілді. Жыл сайын бірінші сыныпқа баратын балалардың саны артып келеді. Егер өткен жылы бірінші сыныпқа 2872 бала барса, биыл 3249 бала мектеп табалдырығын алғаш рет аттады, — деп атап өтті Бану Нұрғазиева.

Облыста жүзеге асырылып жатқан барлық бағдарламалар, бірінші кезекте, халықты жұмыспен қамтуға, жаңа жұмыс орындарын құруға, облыс кәсіпорындарында жаппай жұмыстан босату фактілерін болдырмауға бағытталған. Жыл басынан бері 17 837 жұмыс орны құрылды. Жастарды жұмыспен қамту мақсатында Маңғыстауда 2015 жылы «Жаңа серпін» өңірлік бағдарламасы қабылданды. Аталған құжат алдымен жастарды кәсіптік оқытудан өткізу және басым бағыттағы жұмыстарға орналастыру арқылы өңіраралық еңбек мобилдігін арттыруға бағытталған.

— Қазіргі уақытта осы жұмыстардың нәтижесін көріп отырмыз. Мысалы, Жаңаөзен қаласы, Бейнеу, Жетібай және Мұнайшы ауылдарының 153 жұмыссыз жастары Ақтау қаласындағы кәсіпорындарға жұмысқа орналастырылды. Барлығы да жатақханамен қамтамасыз етілді. Ал кәсіптік оқыту барысында «Каспио пласт» және «Ақтау солтүстік теңіз терминалы» компанияларының тапсырысы бойынша Қарақия ауданы мен Жаңаөзен қаласының жұмыссыз 40 жас тұрғыны оқудан өтіп, жұмысқа орналастырылды. «Ерсай» компаниясынан кадрларды дайындауға 1400 маманға тапсырыс түсті. Осы жұмыстарды әрі қарай жалғастыру үшін Ақтау қаласында және Құрық ауылында әрқайсысы 500 орынды 2 жатақхана салынады. Мұндай жатақхананы Форт-Шевченко қаласына да салу жоспарлануда, — деп хабарлады Маңғыстау облысы әкімінің орынбасары Бану Нұрғазиева.

Маңғыстау облысының әкімдігі

14435311_676355902521698_7369239808234821557_o

14525246_676355865855035_9195899615822824573_o

14434825_676355875855034_7309956863887493409_o