ardager ҰОС ардагері

2019 жылдың 1 мамырдағы мәлімет бойынша, Қазақстанда Ұлы Отан соғысының 1425 қатысушысы мен тікелей мүгедегі, сондай-ақ 87 мыңнан астам ҰОС ардагерлері тұрады, олардың ішінде қоршаудағы Ленинград тұрғындары, тыл еңбеккерлері, қайтыс болған ҰОС мүгедектерінің жұбайлары, концлагерьдің бұрынғы кәмелетке толмаған тұтқындары бар, — деп хабарлайды mangystaumedia.kz сайты ҚР Еңбек және халықты әлеуметтік қорғау министрлігіне сілтеме жасап.

Министрліктің мәлімдеуінше, жергілікті әкімдіктер өз бюджетінің мүмкіндігіне қарай біржолғы ақшалай төлем мөлшерін дербес белгілейді. Барлық әкімдік ардагерлерге қолдау көрсету және оларға құрмет көрсету іс-шаралар жоспарын әзірлеген.

Ең үлкен соманы Шығыс Қазақстан облысында тұратын ардагерлер 542 мың теңге, Нұр-Сұлтан қаласында — 519 мың теңге, Ақмола және Павлодар облыстарында — шамамен 500 мың теңге алады. Қарағанды, Атырау, Ақтөбе және Батыс Қазақстан облыстарында төлем 300 мың теңгені құрайды. Маңғыстау, Солтүстік Қазақстан және Түркістан облыстарында, сондай-ақ Алматы және Шымкент қалаларында шамамен 250 мың теңге қарастырылған. Қызылорда облысында 202 мың теңге, Қостанай және Жамбыл облыстарында 150 мың теңгеден.

Сонымен қатар ҚР Еңбек және халықты әлеуметтік қорғау министрлігі 2019 жылы Ұлы Отан соғысының әрбір қатысушысына және мүгедегіне кем дегенде 300 мың теңге төлеуді ұсынды.

«Сондай-ақ қоршаудағы Ленинград тұрғындарына — жалпы сомасы 3,4 млн. теңгеге 69 адамға, концлагерлердің жасы кәмелетке толмаған бұрынғы тұтқындарына (283 адам — 14,5 млн. теңге), қайтыс болған ҰОС мүгедектерінің жұбайларына (4 179 адам — 79,1 млн. теңге), ҰОС кезінде қаза болғандардың жесірлеріне (364 адам — 11,5 млн. теңге), тыл еңбеккерлеріне (67 479 адам-1,3 млрд. теңге) және ҰОС қатысушылары мен ардагерлеріне теңестірілген басқа азаматтарға (15 066 адам-676 млн. теңге) түрлі біржолғы төлемдер тиесілі», — делінген хабарламада.

Бұдан басқа, ҰОС мүгедектерін бірінші кезекте санаторлық-курорттық емдеумен, протездік-ортопедиялық бұйымдармен, протездеу бойынша медициналық қызметтермен, сурдоқұралдармен және басқа да компенсаторлық қосалқы құралдармен, міндетті гигиеналық құралдармен, кресло-арбалармен және дәрілік заттармен қамтамасыз ету жоспарлануда.

Жеңістің 74 жылдығына орай 88 862 ҰОС ардагерлеріне 2,6 млрд. теңгеден астам сомаға бір жолғы материалдық көмек төленеді.